თანამდებობიდან მიდის აშშ-ის კონგრესის წარმომადგენელთა პალატის პირველი ქალი სპიკერი

აშშ-ის კონგრესის წარმომადგენელთა პალატის დემოკრატმა სპიკერმა ნენსი პელოსიმ გამოაცხადა, რომ თანამდებობიდან მიდის. მისი გადაწყვეტილება განაპირობა 8 ნოემბრის შუალედური არჩევნების შედეგად, კონგრესის ქვედა პალატის უმრავლესობაში რესპუბლიკელების მოსვლამ. 82 წლის ნენსი პელოსი, რომელიც ერთ-ერთი ყველაზე გავლენიანი დემოკრატი პოლიტიკოსია, არ აპირებს ახალი მოწვევის წარმომადგენელთა პალატაში პარტიის ლიდერობა განაგრძოს. 17 ნოემბერს პელოსიმ განაცხადა, რომ დადგა დრო, დემოკრატების ფრაქციას ახალმა თაობამ უხელმძღვანელოს. три ნენსი პელოსი აშშ-ის ისტორიაში პირველი ქალია, რომელიც წარმომადგენელთა პალატის სპიკერი გახდა. პელოსიმ ეს თანამდებობა პირველად 2006 წლის, მეორედ კი, 2018 წლის არჩევნების შემდეგ დაიკავა. ნენსი პელოსი კალიფორნიის შტატიდან კონგრესის ქვედა პალატის წევრია 1987 წლიდან და ამ სტატუსით გააგრძელებს საქმიანობას 2022 წლის ნოემბერში არჩეულ წარმომადგენელთა პალატაში, რომელიც უფლებამოსილების შესრულებას 2023 წლის იანვრიდან დაიწყებს. აშშ-ის კონგრესის ქვედა პალატის ახალ სპიკერად რესპუბლიკელების მიერ წარდგენილია კევინ მაკკარტი, რომელიც წარმომადგენელთა პალატის ჯერ კიდევ მოქმედ შემადგენლობაში რესპუბლიკელთა უმცირესობის ლიდერია. ...